Afhending trúnaðarbréfs og opinber heimsókn forseta til Slóvakíu

Kristín A. Árnadóttir sendiherra afhenti þann 24. október 2022 Zuzana Čaputová, forseta Slóvakíu trúnaðarbréf sitt sem sendiherra Íslands í Slóvakíu með aðsetur í Vínarborg.

Athöfnin fór fram í forsetahöllinni í Bratislava, höfuðborg Slóvakíu. Afhendingin fór fram í aðdraganda opinberrar heimsóknar forseta Íslands Guðna Th. Jóhannessonar og forsetafrúar Elizu Reid dagana 26.-28. október.

Af því tilefni var efnt til viðskiptaþings þar sem sjónum var beint að orkuöryggi og mögulegu samstarfi Slóvakíu og Íslands á því sviði. Um 40 fyrirtæki tóku þátt frá báðum ríkjum en Íslandsstofa leiddi þátttöku íslenskra fyrirtækja.

Með í för voru Halla Hrund Logadóttir, orkumálastjóri, sem var frummælandi á viðskiptaþinginu og Willum Þór Þórsson, heilbrigðisráðherra, sem m.a ávarpaði skólayfirvöld og íslenska nemendur sem stunda nám í læknisfræði í borginni Martin og nemendur sem leggja stund á nám í dýralækningum í borginni Kosice.